ალერგიული კონიუქტივიტი

ალერგიული კონიუქტივიტი ანუ წითელი თვალების დაავადება, ხშირად აზიანებს ორივე მხედველობის ორგანოს, თვალში აღმოცენდება:

წვისა და ქავილის შეგრძნება

ცრემლდენა

ქუთუთო წითლდება და შუპდება

ვითარდება სინათლის შიში

ამ სიმპტომების სიმწვავეს კი ალერგენის კონცენტრაცია განაპირობებს, მისი გაუვნებლობის შემთხვევაში ალერგიული რეაქცია თავისთავად მცირდება, მაგრამ ხშირად არ არის შესაძლებელი დადგინდეს ამა თუ იმ ალერგენის არსებობის შესახებ.

გაზაფხულზე განსაკუთრებულად შეიმჩნევა პროცესის გამწვავება სხვადასხვა მცენარის ყვავილობის გამო. ალერგიის გამომწვევებია ხეების, ბალახების, რთულყვავილებიანი მცენარეების მტვერი და ზოგიერთი სოკოს სპორები.

შემოდგომით ალერგიის სიმპტომების გამოვლენის, ან გამწვავების ერთ-ერთი ყველაზე გავრცელებული მიზეზი გახლავთ მომატებული მგრძნობელობა ოთახის მტვრის ტკიპების მიმართ

ამის მიზეზი შეიძლება იყოს:
მაღალი ტენიანობა, რომელიც ხელს უწყობს ოთახის მტვრის ტკიპების გამრავლებას;
დახურულ სივრცეში გადასვლა და შენობაში მეტი დროის გატარება;
ფანჯრებისა და დარაბების დახურვა, ოთახის ნაკლებ განიავება;
ჰაერის გამათბობლის ჩართვა;
თბილი ტანსაცმლისა თუ პლედის გადმოღება კარადიდან;

ალერგიული კონიუქტივიტი, შესაძლოა გამოვლინდეს სხვადასხვა მედიკამენტის, ასევე კოსმეტიკური საშუალებების გამოყენების დროს. სიმპტომები, შესაძლოა იმდენად იყოს გამოხატული, რომ ხელს უშლიდეს ადამიანს მუშაობაში, ამცირებდეს მის შრომისუნარიანობას, იწვევდეს ძილის დარღვევას .

როგორ ხდება დიაგნოსტიკა?

ალერგიული კონიუნქტივიტის დიაგნოსტიკა ძირითადად ხდება კლინიკურად გამოხატული ნიშნების მიხედვით. გამოიყენება ალერგიული სინჯები.

• რა სახის გართულება შეიძლება განვითარდეს?

უმეტეს შემთხვევაში ალერგიული კონიუნქტივიტი არ იწვევს რაიმე სერიოზულ გართულებებს, მაგრამ აუცილებელია მისი სხვა დაავადებებისგან დიფერენცირება და, კონკრეტულ შემთხვევაში, შესაბამისი მკურნალობის დანიშვნა სპეციალისტის მიერ, რადგან გარკვეული ჯგუფის პრეპარატების თვითნებურმა და ხანგრძლივმა გამოყენებამ, შესაძლოა პირიქით უარყოფითი ზეგავლენა მოახდინოს მხედველობის ორგანოზე.

• როგორ ხდება მკურნალობა?

ალერგიული კონიუქტივიტის მკურნალობა, ისევე როგორც ნებისმიერი სხვა ალერგიული დაავადებებისა, არის მიმართული მწვავე ალერგიული სიმპტომების მოხსნისკენ და საჭიროებს ადგილობრივი და სისტემური ანტიჰისტამინური საშუალებების გამოყენებას.